Komisioni Qendror i Zgjedhjeve ka reaguar sërish, duke bërë me dije se procesi i verifikimit të rezultateve të raundit të dytë të zgjedhjeve për Kryetar të Komunës, është duke vazhduar në Qendrën Komunale të Numërimit në Mitrovicë të Jugut. KQZ njofton po ashtu se të martën është përmbyllur verifikimi i rezultateve në 17 Qendra Komunale të Numërimit: Junik, Mamushë, Kllokot, Obiliq, Klinë, Vushtrri, Dragash, Rahovec, Gjakovë, Gjilan, Fushë Kosovë, Suharekë, Kaçanik, Prishtinë, Viti, Prizren dhe Pejë. Partia Demokratike e Kosovës ka kërkuar që Mitrovica e Jugut të shkojë në rivotim, dy ditë pas përfundimit të balotazhit në këtë komunë, pasi ka ngritur dyshime për manipulime me vota. Sipas PDK, në Mitrovicë të Jugut është përdorur fenomeni i “trenit bullgar”, duke dëmtuar kështu integritetin e procesit zgjedhor. Në balotazhin e së dielës, kandidati i Lëvizjes Vetëvendosje, Faton Peci doli fitues përball kandidatit të PDK-së, Arian Tahiri.