Moti i keq vazhdon të godasë Lombardinë dhe gjatë natës së shkuar, një tjetër stuhi e dhunshme, e shoqëruar nga rrufe të panumërta dhe erëra të fuqishme, ka goditur milanon rreth orës 4 të mëngjesit. Stuhia ka përfshirë edhe pjesë të tjera në qendër të Lombardisë. Fenomeni, sipas mediave italiane, është shoqëruar në disa zona edhe me breshër. Stuhia në qytet ishte e shkurtër por shumë intensive dhe parashikimet e motit flasin për mundësinë e përsëritjes së kësaj cmendurie. Në rajonin e Breshias, një 16 vjecare humbi jetën pasi u godit nga një pemë e shkulur me rrënjë nga stuhia. Disa të plagosur ndërkohë janë regjistruar në rajonin e venetos. Kryebashkiaku i Milanos, Giuseppe Sala, tha pas stuhisë: Jemi bombarduar. “Kam parë në jetën time të kalojnë 65 vera dhe kjo e tanishmja nuk është normale, nuk mundemi më ta mohojmë. Ndryshimet e klimës po ndryshojnë dhe rrezikojnë jetën tonë”, tha ai në një mesazh video në mediat sociale, duke iu drejtuar bashkëqytetarëve. “Nuk mundemi thjeshtë të bëjmë sikur nuk ka ndodhur asgjë, por edhe nuk mundemi të qëndrojmë duarlidhur. Edhe Milano duhet të bëjë punën e saj dhe do ta bëjë”, përfundoi ai. Kryebashkiaku foli për një natë të cmendur në të cilën era që u përball mbi qytet i kalonte 100 kilometrat në orë. Autoritetet kanë përveshur mëngët menjëherë duke koordinuar aktivitetet me qëllim që të kufizohen dëmet. Skuadrat e zjarrfikësve, mbrojtja civile dhe agjentët e policisë ndërhynë pas regjistrimit të qindra kërkesave për ndihmë. Vetëm si pasojë e breshërit, kokrra e të cilit ishte sa një top tenisi, janë lënduar4 tetë persona në Trevinjano dhe 4 në Trevizo.