Britania dhe Gjermania do të nënshkruajnë atë që qeveria e Mbretërisë së Bashkuar e quan një "marrëveshje të rëndësishme të mbrojtjes" që synon rritjen e sigurisë, investimeve dhe vendeve të punës. Sipas marrëveshjes, kompania gjermane e mbrojtjes Rheinmetall do të hapë një fabrikë të re në Mbretërinë e Bashkuar për të prodhuar tyta për armë artilerie, që do të hapin mbi 400 vende pune. Të dy vendet do të punojnë së bashku për të zhvilluar dronë dhe një raketë të re me rreze të gjatë veprimi. Avionët gjermanë të mbikëqyrjes detare gjithashtu do të fluturojnë periodikisht me patrullat e Atlantikut të Veriut nga baza ajrore e RAF në Lossiemouth në Skoci. Laburistët premtuan të ndërtonin lidhje më të ngushta ushtarake me Gjermaninë ndërsa ishin në opozitë dhe kjo është pjesë e një shtytje më të gjerë nga kjo qeveri për të rivendosur marrëdhëniet me aleatët kryesorë evropianë pas Brexitit. Ambasadori gjerman në Mbretërinë e Bashkuar, Miguel Berger, tha se Komisioni Evropian do të ketë një fokus shumë të fortë tek mbrojtja në pesë vitet e ardhshme dhe ka hapësirë që Mbretëria e Bashkuar të përfshihet.