Përgjimet e SPAK dhe autoriteteve italiane për operacionin “Highway” zbuluan ndër të tjera ish zëvendësministren Rovena Voda dhe ish prokurorin e Kukësit, Edmond Karriqi. Nga dokumentet e prokurorisë së Bergamos rezulton se ish zëvendësministrja, Rovena Voda ka biseduar për punësimet në ministri me Florida Beun, e cila është motra e njërit prej të akuzuarve si pjesë e grupit kriminal të trafikut të drogës. Sipas dosjes, Florida Beu ka qenë në përgjim ambiental me kërkesë të SPAK. Rovena Voda u arrestua pasi me akuzën e rryshfetit në këmbim të një vendi pune në administratë. Voda u dënua me një vit e tre muaj burg, por me gjykim të shkurtuar përfitoi ulje dënimi në 10 muaj burg. Dënim që tashmë ka përfunduar. Gjithashtu në dokumentin e prokurorisë së Bergamos rezulton edhe ish prokurori i Kukësit, Edmond Karriqi, i cili gjithashtu është zbuluar indirekt nga përgjimet e kryera në kuadër të këtij operacioni. Ndaj Karriqit rëndonte akuza e ‘korrupsionit pasiv’ dhe sipas provave të SPAK rezultonte që ish-prokurori kërkoi dhe mori përfitime monetare të parregullta, me qëllim për të favorizuar disa persona nën hetim.