Dosja e SPAK në ngarkim të Jamarbër Malltezit, vjehrrit të tij Sali Berisha dhe ndërtuesit Fatmir Bektashi zbulon se përfituesit e terreneve sportive të klubit Partizani pretendonin prej vitit 1994 kthimin e pronave të tyre. Gjatë kësaj periudhe, thuhet në dosje, pretendimet e tyre janë përballur me refuzimin kategorik të institucioneve. Kjo ka ndodhur deri në vitin 2005. Arsyeja e këtij refuzimi lidhej me statusin e pronës si pjesë e Forcave të Armatosura, që deri në këtë kohë ndalohej nga ligji për kthimin dhe kompensimin e ish-pronarëve që të tjetërsoheshin. Por, dyert e institucioneve për trashëgimtarët e pronës u hapën pas vitit 2005, kur erdhi në pushtet Sali Berisha dhe sidomos, sipas dosjes së SPAK, pasi ata nënshkruan marrëveshje kontraktore me Jamarbër Malltezin, dhëndrin e Sali Berishës. Në dosjen voluminoze, SPAK pretendon se Malltezi ishte trashëgimtar i rreth 113 metër katror në këtë pronë, por e shumëfishoi atë falë gatishmërisë së vjehrrit të tij, Sali Berisha për të ndryshuar ligje, vendime qeveria, si dhe për të përdorur institucionet e varësisë sim jet shantazhi ndaj zyrtarëve që rezistoni, ose dyshohet ndaj kërkesave të Malltezit.