Asgan Mernica, autori I vrasjes së efektivit të forcave shqiponja Novruz Cenalia u arrestua mbrëmjen e kësaj mërkure. Mësohet se vrasësi I policit u vetëdorëzua në drejtorinë e policisë së Fierit pas negociatave të zhvilluara nga familjarët. 23-vjeçari sipas burimeve pranë uniformave blu gjatë këtyre tre ditëve po fshihej në afërsi të fshatit Dërmënas. Novruz Cenalia, efektiv i “Forcave Shqiponja”, 28 vjeç mbeti i vrarë mesditën e të hënës së 13 majit, në fshatin Baltëz të Fierit. Ai ishte duke shkuar në punë për të marrë shërbimin kur u qëllua me pistoletë në kokë nga Asgan Mernica. Pas ngjarjes autori u arratis me shpejtës duke lënë makinën tip “Audi’ ngjyrë blu tek shtëpia e dajës së tij dhe më pas u largua në drejtim të paditur. Sipas dëshmisë së dhënë nga nëna e autorit, e cila ndodhej në makinë më të në momentin e vrasjes, dy të rinjtë u konfliktuan për kalimin në rrugën e ngushtë të fshatit. Më pas sipas nënës ata dolën nga makinat dhe debatuan fillimisht me njëri-tjetrin, deri kur djali i saj nxorri armën dhe e qëlloi me një plumb në kokë policin, plumb që rezultoi fatal për të.