Aleanca Turke, ku janë bashkuar 7 parti politike, shpalli si kandidat presidencial Ahmet Özal, djalin e Presidentit të 8 të Turqisë, Turgut Özal. Lajmin e dha vetë 67-vjeçari, pas përfundimit të një takimi mes partive që janë bashkuar nën Aleancën Turke, si Partia e Bashkimit Anatolian, Partia Republikane e Pavarur, Partia Osmane, Partia e Zhvillimit të Teknologjisë, Partia Patriotëve, Partia Mëmëdheu i Ri dhe Partia Rruga e Re. Ahmet Ozal dha dorëheqjen nga partia e tij dhe tha se do të dalë në garë si kandidat i pavarur, teksa falënderoi krerët e 7 partive të Aleancës Turke, që vendosën ta mbështesin në zgjedhje, duke ia shtuar edhe më shumë besimin fitore. Politikani 67-vjeçar tha se një president i pavarur dhe i paanshëm është thelbësor për një vendimmarrje të drejtë, teksa solli në vëmendje se është një ndjekës i madh i zhvillimeve politike që në moshë të re. “Falë babait tim të ndjerë, kam qëndruar gjithmonë pranë çështjeve politike të brendshme dhe të jashtme të Turqisë, kam fituar përvojë të madhe. Në vitet në vijim kam ndjekur nga afër politikën, teknologjinë dhe ndryshimet në botë. Turqia duhet të përgatitet shpejt për këto ndryshime, pasi përnryshe do të humbë shumë dhe faturën do ta paguajnë 85 milionë njerëz”, tha Ahmet Ozal Pamjet: AFP