Numri i viktimave të shkaktuara nga temperaturat e ulëta në Afganistan është rritur, me 120 jetë të humbura nga i ftohti që ka mbërthyer vendin vetëm këto dy javë të fundit. Zyrtarët e autoritetit kombëtar të menaxhimit të fatkeqësive në vend, thanë për agjencitë e huaja të lajmeve se më shumë se 50 shtëpi janë shkatërruar dhe mbi 70 mijë kafshë kanë ngordhur po ashtu nga i ftohti ekstrem. Sëmundjet e frymëmarrjes, kryesisht te fëmijët, shtohen çdo vit gjatë stinës së ftohtë, por ky dimër ka qenë jashtëzakonisht i acartë dhe në të njëjtën kohë, gjithnjë e më shumë afganë po përballen me varfërinë. Sipas Departamentit Meteorologjik të Afganistanit, temperatura më e ulët e regjistruar në janar ishte minus 34 gradë celsius në provincën qendrore të Ghorës. Më shumë se gjysma e 38 milionë banorëve të Afganistanit po përballen me urinë dhe gati 4 milionë fëmijë vuajnë nga kequshqyerja, sipas agjencive të ndihmave humanitare.