Policia e Kosovës ka njoftuar se në orët e hershme të së mërkurës ka marrë informacione për vënien e zjarrit dhe djegien e një makine me targa RKS – Republika e Kosovës – në Zubin Potok, pronari i të cilës ishte një qytetar i komunitetit serb. Policia tha se zjarrfikësit kanë dalë në vendngjarje dhe se autoritetet janë duke hetuar rastin. Ky njoftim vjen një ditë pasi Qeveria e Kosovës ka nisur të zbatojë planin në tri faza për riregjistrimin e makinave me targave ilegale serbe në RKS. Faza e parë përfshin qortimin e shoferëve, e dyta parasheh gjobë deri në 150 euro për ata shoferë, dhe e treta targa provuese. Zbatimi i këtij plani pritet të përfundojë më 21 prill dhe, nga ajo datë, në qarkullim do të lejohen vetëm makina me targa RKS. Në komunat veriore të Kosovës të banuara me shumicë serbe - Mitrovicë e Veriut, Zveçan, Leposaviq dhe Zubin Potok - llogaritet se janë deri në 10.000 automjete me targa ilegale serbe. Këto targa i lëshon Serbia dhe bartin akronime serbe të qyteteve të Kosovës. Në javët e fundit janë shtuar incidentet në veri të Kosovës, që kryesisht kanë në shënjestër serbët që po riregjistrojnë makinat në RKS. Institucionet e Kosovës kanë fajësuar “grupet ilegale ekstremiste” për këto incidente.