Partia Demokratike vijon me denoncimin e problematikave me votën e diasporës. Këtë herë, PD nëpërmjet përfaqësuesit ligjor në Komisionin Qendror të Zgjedhjeve Franc Nuri, kërkon ndërhyrje urgjente në këtë proces, për shkak të ndërhyrjeve të paligjshme në proces, që sipas tij po cënojnë atë. Sipas Nurit, është e pakuptueshme se përse operatori postar, edhe pse paguhet që votën ta çojë pranë secilit votues të regjistruar, duke ia dhënë personalisht në dorë, tashmë u kërkohet që të shkojnë pranë zyrës postare për ta marrë. Sipas PD, kjo ka sjellë një tjetër problematikë, ku një person shkon e tërheq disa zarfe, me pretendimin se i njeh dhe do të jua dërgojë në shtëpi. Për këtë arsye, referuar edhe disa denoncimeve, PD pretendon se shumë qytetarë nuk kanë marrë dot zarfin me materialet zgjedhore, pasi ato janë marrë nga persona të tjerë, që dyshohet se do të votojnë në emër të tyre. Pikëpyetje PD ngre edhe mbi mbërritjen e 6000 zarfeve nga Greqia në vetëm një ditë.