Të tjera detaje janë zbardhur nga dosja hetimore 4-vjeçare mbi ish-muxhahedinët e vënën nën hetim nga Prokuroria e Posaçme, pasi ka dyshime se ata janë rekrutuar nga Shërbimet Sekrete Iraniane. Në dosje bëhet e ditur se nga kontrolli I ushtruar në banesat e 20 personave të vënën nën hetim janë gjetur dhe sekuestruar në cilësinë e provës materiale pajisje të ndryshme elektronike, laptopë, telefona, USB, karta sim, pajisje përgjuese e transmetuese. Autoritetet ndërkohë po vijojnë të hetojnë edhe pajisjet e gjetura, për të zbuluar më shumë rreth të dyshuarve si pjesë e të rekrutuarve nga shërbimi secret Iranian. Sipas dosjes në fjalë, thuhet se që nga ardhja në Shqipëri e muxhahedinëve, 400 janë shkëputur nga kjo organizatë, 300 prej të cilëve janë larguar drejt vendeve të BE, ndonëse mbetet ende e paqartë sesi kanë mundur të largohen nga vendi. Të gjitha pajisjet e dyshimta mësohet se janë gjetur gjatë kontrollit në ambientet e shoqatës “Asila”, zyrat e marra me qira nga një ish-muxhahedin, si dhe në automjetin e tij. Ndërkohë po ashtu janë kontrolluar apartamentet e tjera të marra me qira nga ish-muxhahedinë të tjerë, si dhe një automjet në pronësi të një shtetasi shqiptar dhe në përdorim të një iraniani. Autoritetet shqiptare mësohet se po bashkëppunojnë edhe me organet e huaja ligjzbatuese për të zbuluar nëse ata kanë qenë të përfshirë në akte terrori.