Studentët dhe aktivistët e Lëvizjes për Universitetin protestuan të mërkurën para Ministrisë së Arsimit duke kërkuar dorëheqjen e ministres Evis Kushi, në pretendimin se ajo me deklaratat e saj ka dalë kundër tubimeve të rinjve organizuar këto ditë si reagim për vrasjen e 25 vjeçarit Klodian Rasha. Aktivistet dhe studentet kanë qëlluar godinën e ministrisë me vezë të lyera me bojë të zezë. Kushi përmes një postimi në rrjetet sociale ka përgënjeshtruar fjalët që kanë dalë duke thënë se është keqcituar dhe është shpifur ndaj saj. Ministrja Kushi ka thënë se është pro protestave, por kundër atyre të dhunshme, kundër dëmtimit të pronës publike e private, e sidomos kundër keqpërdorimit të fëmijëve nëpër protesta.“Jam mësuar gjatë gjithë jetës të mbaj përgjegjësi për çdo deklaratë e fjalë të thënë nga goja ime, por aq më tepër tani përgjegjësia është edhe më e madhe sepse përfaqësoj institucionin e Ministrisë së Arsimit, Sportit dhe Rinisë. Nuk mund të rri pa përgënjeshtruar sa herë shpifet ndaj meje, apo sa herë keqcitohem, me apo pa dashje. Në çdo deklaratë jam shprehur se vlerësoj protestat si një ndër arritjet tona më të mëdha, e sa më e qetë e qytetare protesta, aq më e fortë kauza e saj. E ndërkohë pa dyshim jam shprehur kundër dhunës në protesta, kundër dëmtimit të pronës publike e private, e sidomos kundër keqpërdorimit të fëmijëve nëpër protesta. Për këta kemi të gjithë detyrimin që t’i edukojmë me vlerat më të mira të demokracisë, qytetarisë, paqes dhe tolerancës”, thotë Kushi ne postimin e saj.