Deklarata polemizuese ndaj genocidit në Srebrenicë po i kushton shtrenjtë ministrit malazez të drejtësisë, Vladimir Leposavic. Pas polemikave të forta që ngjallën komentet e tij, ndaj të cilave reagoi ashpër edhe zëvëndeskryeministri, Dritan Abazovic, shefi i ekzekutivit Zdravko Krivokapic, propozoi shkarkimin e ministrit. Në një konferencë të jashtëzakonshme për gazetarë, Krivokapic tha se e ka dërguar këtë propozim në Parlamentin e vendit. Në 26 mars, Leposavic tha gjatë një serance parlamentare se është i gatshëm të pranojë se në Srebrenicë ka ndodhur genocid “kur një gjë e tillë të vërtetohet pertej cdo dyshimi:, duke sfiduar kësisoj edhe vetë legjitimitetin e Gjykatës së Hagës për ish-Jugosllavinë, e cila ka dalë në përfundimin se në Srebrenicë ka ndodhur gjenocid. Kryeministri sqaroi se i kishte dërguar Leposavicit një mesazh ku i kërkonte që të shpjegohej përpara opionionit për atë pohim, por ai duket nuk ka lëvizur nga qëndrimi i vet. Deklarata e ministrit nxiti reagime të shumta nga publiku vendas dhe ndërkombëtar, e madje edhe thirrje për dorëheqjen e tij, ndërsa ka pasur gjithashtu apele për një reagim nga ana e prokurorisë.