Pas shfaqjes misterioze nëpër aeroportet civile daneze, dronët fluturuan edhe në bazën ushtarake më të madhe të vendit, duke përshkallëzuar serinë e incidenteve që shkaktuan ndërprerjen e fluturimeve në fillim të kësaj jave. Pajisjet u vunë re mbi bazën ajrore Karup, duke e detyruar autoritetet të mbyllnin përkohësisht hapësirën për trafikun komercial. “Mbrojtja daneze mund të konfirmojë se dronët u panë në disa lokacione të mbrojtjes së Danimarkës. Disa kapacitete të mbrojtjes u dislokuan”, tha një zëdhënës i Forcave të Armatosura të Danimarkës. Incidente të ngjashme u raportuan edhe në Gjermani, Poloni dhe Lituani. Ky është rasti i fundit në një varg aktivitetesh të dyshimta të dronëve në Danimarkë, duke ngritur shqetësime në lidhje me cenueshmërinë e vendit ndaj sulmeve ajrore dhe duke shkaktuar frikën e përfshirjes së mundshme ruse. Autoritetet daneze thanë se inkursionet e së enjtes me gjasë ishin një "sulm hibrid", por paralajmëruan se nuk kishin prova që të sugjeronin se Moska ishte pas tij.