Postimi i një gazetari brazilian, sipas të cilit Dani Alvesh ka vrarë veten në qeli është bërë viral në rrjet, po fatmirësisht lajmi ka qenë i rremë. Gazetari brazilian Paulo Albukuerkue ka shpërndarë në lajmi në rrjetin social X, duke cituar burime të veta, por pa sqaruar më shumë. Në lidhje me lajmin nuk pati asnjë konfirmim, apo mohim zyrtar, por ka qenë vëllai i ish-futbollistit që e ka cilësuar të turpshëm dhe mizore postimin. Nej Alvesh e ka cilësuar si mizore atë që po ndodhte me vëllanë e tij Dani Alvesh, i cili muajin e kaluar u dënua me katër vite e gjysmë burg për përdhunimin e një të reje në një diskotekë në Barcelonë më 31 dhjetor të vitit të kaluar. “Sa shumë mizori mund të kenë qeniet njerëzore? Ai u dënua për fjalët e një gruaje e cila hyri në banjën e meshkujve që të bënin diçka që vetëm ai dhe ajo e dinë se çfarë. Ai u dënua. A nuk mjafton kjo?”, tha ai fillimisht në një video të shpërndarë në Instagram. “Tani çmenduria është se e duan të vdekur. Si mund të jeni kaq mizorë? Babai im është mbi 70 vjeç. Nëna ime është mbi 60. A nuk kanë ata familje? Këto faqe që vazhdojnë e përhapin këto gjëra. Zoti pastë mëshirë për ju”, ishin fjalët e tij.