Këtë të premte është shënuar shifra rekord e të infektuarve me koronavirus që prej nisjes së pandemisë. Në harkun kohor të 24 orëve të fundit janë shënuar 289 raste të reja dhe 4 viktima nga 1402 testime të kryera. Me gjithë përpjekjet e mjekëve, fatkeqësisht e kanë humbur betejën me COVID 19 një 37 vjeçar nga Korça pa sëmundje bashkëshoqëruese, një 52 vjeçare nga Mirdita, një 81 vjeçar nga Tirana dhe një 85 vjeçar nga Fier. Rastet pozitive të konfirmuara në 24 orët e fundit janë identifikuar 113 raste në Tiranë, 34 në Fier, 23 në Durrës, 19 në Vlorë e më tej në të gjithë Shqipërinë. Aktualisht në spitalin Infektiv dhe “Shefqet Ndroqi” po trajtohen 255 pacientë, 21 në terapi intensive nga të cilët 4 pacientë janë të intubuar. Ministria e Shëndetësisë bën me dije se janë shëruar 93 qytetarë, duke e çuar në 9957 numrin e të shëruarve në vend që prej fillimit të epidemisë.