Pas disa ditësh të tëra me bilanc shqetësues në rritje, Maqedonia e Veriut ka shënuar gjatë 24 orëve te fundit një reduktim të numrit të viktimave dhe të infektuarve. 120 ishin këta të fundit, dhe 123 të shëruarit. Është e para herë pas një muaji që numrit i personave të shëruar nga Covid 19 kapërcen atë të rasteve të reja. Infektimet e tjera ishin përsëri më së shumti në Shkup e Kumanovë. Katër ishin të vdekurit nga sëmundja, shifër kjo gjithashtu e ulët në krahasim me dy ditët e fundit kur ishin regjistruar përkatësisht 12 dhe 10 viktima. Të vdekurit janë të gjithë nga kryeqyteti dhe i përkasin moshave nga 51 deri në 67 vjec. Mësohet se dhe ata kanë pasur probleme të tjera shëndetësore. Bilanci total I vdekjeve tashmë fiksohet në 306. Ministri i Shëndetësisë, Venko Filipce theksoi sërish nevojën për respektimin e masave mbrojtëse nga Covid-19, por ka përjashtuar mundësinë e mbylljes së kufijve, apo të ndonjë izolimi të zonave që konsiderohen si vatra krize. Ai theksoi se rritja e numrit të të infektuarve në Kosovë, Shqipëri dhe Serbi, nuk rrezikon mbylljen përsëri të kufijve me vendet fqinjë. “ Do të komunikojmë këto ditë me përfaqësuesit e autoriteteve të tyre shëndetësore për të parë se cila është situata dhe cilat janë rreziqet e mundshme për vendin tonë”, është shprehur Filipçe.