Këshilltari i lartë i Departamentit amerikan të Shtetit (DASH), Derek Chollet, do të vizitojë Kosovën këtë të mërkurë, në mes të përpjekjeve të reja ndërkombëtare për të përshpejtuar procesin e normalizimit të raporteve midis Kosovës dhe Serbisë. Chollet do të qëndrojë fillimisht në Shkup, ndërkaq një ditë më pas do të vizitojë edhe Serbinë. Në Prishtinë, Chollet fillimisht do të takohet me presidenten e Kosovës, Vjosa Osmani, ndërsa një orë më pas është parashikuar edhe takimi me kryeministrin Albin Kurti. Sipas njoftimit të DASH-it, ai do të bisedojë me krerët në Kosovë dhe të Serbisë për integrimin euroatlantik, përfshirë edhe arritjen e një marrëveshjeje për normalizimin e raporteve mes dy shteteve, të bazuar në njohje reciproke. Për analistët kosovarë, vizita e zyrtarit të lartë është e rëndësishme për sa i takon dinamizimit të procesit të dialogut.