Pasi talebanët morën kontrollin e afganistanit, menjëherë pas tërheqjes së trupave amerikane, polemikat kanë qenë të shumta ndërkohë që ekspertë të sigurisë nxjerrin në dukje faktin se vendi ka një sasi jashtëzakonisht të madhe mineralesh të papërdorura mbi të cilat tani janë ulur militantët islamikë. Bëhet fjalë në fakt për një nga vendet më të varfra në botë, por në 2010-ën, ushtarët amerikanë dhe disa gjeologë, zbuluan se afganistani ka rezerva mineralesh që kapin vlerën e afro një trilion dollarëve. Rezervat e hekurit, bakrit dhe arit janë të shpërndara në të gjitha provincat. Ekzistojnë gjithashtu minerale të rralla dhe ndoshta më e rëndësishmja është rezerva më e madhe në botë e litiumit, përbërës thelbësor i baterive që rimbushen dhe teknologji tjera që kanë rëndësi jetike për trajtimin e krizës klimatike. “Afganistani është zona e pasur me metale të çmuara, por edhe me metale të nevojshme për ekonominë e ardhshme të shekullit 21”, tha Rod Schoonover, shkencëtar dhe ekspert i sigurisë që ka themeluar “Ecological Futures Group”. Sfidat e sigurisë, mungesa e infrastrukturës dhe thatësirat e mëdha, kanë penguar shfrytëzimin e mineraleve në të kaluarën. E kjo nuk ka gjasa të ndryshojë shpejt – duke marrë parasysh se tani këtë vend e kanë nën kontroll talebanët. Megjithatë, ka interesim të madh nga disa vende, përfshirë Kinën, Pakistanin dhe Indinë, që po përpiqen të përfshihen pavarësisht kaosit të krijuar.