Njoftimi i Presidentit amerikan Donald Trump se Ukraina do të marrë sisteme raketash Patriot si pjesë e një pakete të re armësh amerikane është mirëpritur në Kiev, ndërsa vendi përballet me bombardime ruse çdo natë. Presidenti Volodymyr Zelensky ka bërë kërkesa të përsëritura për sistemet Patriot në javët e fundit, ndërsa Moska lëshon një numër rekord dronësh dhe raketash për të shkaktuar kaos dhe frikë në qytetet e Ukrainës. Por kishte pak detaje specifike në njoftimin e Trump, dhe mbeten pikëpyetje të mëdha se sa do të marrë Ukraina, kur do të mbërrijnë dhe kush do t'i sigurojë ato. Sistemet Patriot, janë sistemi kryesor i mbrojtjes nga raketat i Ushtrisë Amerikane. Ata e provuan vlerën e tyre muajin e kaluar, kur ndihmuan në rrëzimin e 13 nga 14 raketat iraniane që u lëshuan në Bazën Ajrore Al Udeid të Forcave Ajrore Amerikane në Katar. Versionet më të fundit të interceptorëve Patriot janë të aftë të përballen me raketa balistike me rreze të shkurtër veprimi, raketa lundrimi dhe dronë në lartësi deri në 15 kilometra dhe distanca deri në 35 kilometra. Analistët thonë se kjo i jep një baterie të vetme Patriot aftësinë për të mbuluar 100 deri në 200 kilometra katrorë sipërfaqe, varësisht nga numri i lëshuesve në bateri, terreni lokal dhe kushtet e tjera. Kjo nuk është një zonë e madhe në një vend me përmasat e Ukrainës, me më shumë se 603,000 kilometra katror sipërfaqe. Prandaj, Kievi ka nevojë për bateri të shumta Patriot. Një bateri përbëhet nga gjashtë deri në tetë lëshues raketash, secili i aftë të mbajë deri në 16 interceptorë, së bashku me një radar, një stacion kontrolli, një stacion gjenerimi energjie, të gjitha të montuara në kamionë dhe rimorkio. Rreth 90 persona nevojiten për një bateri Patriot, por vetëm tre ushtarë në qendrën e komandës dhe kontrollit mund ta operojnë atë në një situatë luftimi.