Qeveria greke ka reaguar duke mohuar kategorikisht se çështja çame të jetë diskutuar në takimin e zhvilluar të mërkurën (17.12.2025) mes ministres për Europën dhe Punët e Jashtme Elisa Spiropali dhe homologun grek Giorgos Gerapetritis. Pas raportimeve në shtypin grek, sipas të cilave ministrja shqiptare kishte ngritur, qoftë edhe me nënkuptime, çështjen e Çamëve dhe kishte kërkuar heqjen e ligjit të “luftës”, zëdhënësi I qeverisë greke, Pavlos Marinakis është shprehur se çështja çame nuk është ngritur kurrë. “Qëndrimi i Greqisë për këtë temë është i pandryshueshëm dhe nuk ndryshon në asnjë rrethanë”, -është shprehur Pavlos Marinakis. Sipas artikullit të gazetës greke ‘Demokracia’, deklaratat e ministres shqiptare janë vlerësuar si provokuese. Më tej shkruhet, se ministrja Spiropali gjatë takimit foli për aspekte historike, ligjore dhe pronësore që lidhen me qytetarë dhe komunitete, duke e cilësuar këtë si një referencë të tërthortë ndaj çështjes çame, ndërsa kanë kritikuar ministrin grek Gerapetritis se nuk ka reaguar aspak. Ministri i Jashtëm grek, Giorgos Gerapetritis vlerësoi gjatë takimit se minoriteti grek në Shqipëri, është hallkë lidhëse mes dy vendeve. Në një deklaratë të përbashkët ai tha se Greqia mbështet rrugëtimin e Shqipërisë drejt BE.