Duke mos lejuar asnjë figurë opozitare të kandidojë përballë tij, presidenti rus duket i vendosur të mbajë kontrollin e tij në pushtet deri të paktën në vitin 2030. Nga e premtja deri të dielën, votuesit rusë do të shkojnë në qendrat e votimit për të zgjedhur presidentin e ardhshëm të vendit, që me siguri të plotë do të jetë sërish Putin. Nuk ka asnjë dyshim midis vëzhguesve ndërkombëtarë se Vladimir Putin, i cili kandidon për mandatin e tij të pestë gjashtëvjeçar, do të dalë fitimtar. Shumë prej kundërshtarëve të tij janë heshtur, burgosur ose dëbuar, asnjëri nuk është lejuar të garojë kundër tij dhe mediat e pavarura që mund të shfaqin kritika ndaj politikave të tij, janë bllokuar. Një fitore për presidentin aktual do të thotë se Putini ka të ngjarë të qëndrojë në pushtet të paktën deri në vitin 2030, kohë në të cilën ai do të jetë 77 vjeç. Pavarësisht nga rezultati i tyre i parashikueshëm, zgjedhjet sërish po vëzhgohen nga afër nga ata që përpiqen të kuptojnë se ku mund të shkojë Rusia, dhe çfarë rrjedhe do të marrë konflikti në Ukrainë.