Gjykata e Posaçme ka shtyrë për datën 19 janar seancën e radhës të shqyrtimit paraprak ndaj kryebashkiakut të Tiranës, Erion Veliaj dhe bashkëpandehurve të tjerë në dosjen e ngritur kundër tij. Sipas burimeve zyrtare, shkak për shtyrjen e seancës u bë mungesa e dy avokatëve mbrojtës, mes tyre edhe avokatja kryesisht e caktuar nga gjykata për mbrojtjen e Veliajt. Përmes një emaili me të cilin u njoh gjykata, avokatja ka kërkuar shtyrjen e seancës, duke argumentuar se ndodhej jashtë vendit. Në seancën e kësaj të hëne nuk ka qenë i pranishëm as kryebashkiaku Erion Veliaj dhe shkak për këtë është bërë mosshoqërimi i tij nga ana e Drejtorisë së Përgjithshme të Burgjeve. Sipas Policisë së Burgjeve në Durrës, Veliaj ka qenë prej orës 7 të mëngjesit në pritje të furgonit të shoqërimit për në Tiranë. Por, furgoni ka mbrritur rreth orës 9 në Durrës, kur në të njëjtën ore niste seanca në GJKKO.