Prokuroria pranë Gjykatës së Shkallës së Parë në Dibër ka kërkuar dënimin me burgim të përjetshëm për Islam Matën, të akuzuar për vrasjen me paramendim të Petrit Puplës më 21 janar 2024, ngjarje e ndodhur në fshatin Vig, Burrel. Prokurorisë thotë se shtetasi Islam Mata vrau me armë zjarri Petrit Puplën, ndërkohë që ishte në shoqërinë e një tjetër personi pranë tij. Pasi ka kryer aktin, ai ka njoftuar policinë dhe u largua drejt banesës së tij. Sipas hetimeve, viktima Petrit Pupla qëlloi me armë vajzën e Islam Matën 12 vite më parë, pasi ishte dashuruar dhe kishte kërkuar fejesën me të, ndërsa familja e saj nuk e pranoi, duke e fejuar me një tjetër. Djali I autorit, ka sqaruar se babai i tij Islam Mata kishte konflikt të vjetër me shtetasin Petrit Pupla pasi ai i kishte plagosur me armë vajzën e tij, veprim për të cilin ai u dënua me 12 vite burgim. Për këtë konflikt, megjithëse Petrit Pupla kishte kryer dënimin palët nuk ishin pajtuar. Madje, kohët e fundit, 3-4 muaj para se të ndodhte vrasja, shtetasi Islam Mata i dërgoi mesazh nëpërmjet dajës së tij, që viktima të mos shkonte më në fshat se nëse do t’i dilte para do ta vriste. Prokuroria sqaron se motivi i vrasjes është hakmarrja, pasi marrëdhëniet konfliktuale dhe plagosja e vajzës ishin shkaku i aktit fatal. Në kërkesën për gjykim, Prokuroria konstaton plotësimin e elementeve të veprës penale “Vrasja me paramendim”, duke kërkuar dënimin maksimal për Islam Metën sipas Kodit Penal.