Shtetet e Bashkuara kanë dërguar një numër 'të paprecedentë' të bombarduesve të tyre të rëndë B-2 në Ishujt Chagos në një shfaqje force mes tensioneve në rritje me Iranin. Gjashtë nga bombarduesit e famshëm amerikanë fluturuan nga baza ajrore amerikane në Diego Garcia nga Misuri javën e kaluar, në 'dislokimin më të madh, të vetëm, në historinë e SHBA'së. Imazhet satelitore të bazës ajrore në Oqeanin Indian, treguan gjashtë prej avionëve në platformë, ngjitur me pistën, të mërkurën e kaluar. "Në dijeninë time, ky është dislokimi më i madh i B-2 në një vendndodhje tjetër, deri më tani", tha Hans Kristensen, drejtor i Projektit të Informacionit Bërthamor në Federatën e Shkencëtarëve Amerikanë. Administrata Trump ka qenë jashtëzakonisht e heshtur për sa i takon dislokimit në Chagos, ishuj që janë në rrezen e goditjes së Iranit dhe Jemenit, ku B-2 janë përdorur për të shënjestruar rebelët Houthi. Ndërsa Steve Ëitkoff, i dërguari i Donald Trump në Lindjen e Mesme, tha muajin e kaluar se kishte ende shpresë se mund të arrihej një marrëveshje me Iranin përmes rrugëve diplomatike, presidenti amerikan ka qenë më i drejtpërdrejtë në kërcënimet kundër regjimit. Trump tha një ditë më parë se nëse bisedimet mes zyrtarëve amerikanë dhe liderëve iranianë këtë fundjavë nuk shkojnë mirë, "Irani do të jetë në rrezik të madh".