Paralajmërimi i Rusisë se Ukraina po përgatitet të përdorë një bombë ndotëse, është plotësisht në përputhje me stilin e pandershëm të Moskës, që akuzon të tjerët për atë që ka ndër mend të bëjë vetë – tha shefi i NATO-s, Jens Stoltenberg, në një intervistë për agjencinë e lajmeve AFP. Stoltenberg, vizitoi aeroplanmbajtësen amerikane që ndodhet aktualisht në Mesdhe, USS George Bush dhe që andej hodhi poshtë dhe dënoi pretendimet e Moskës. Ai, dhe liderë të tjerë perëndimorë, druhen se disfatat e putinit në fushëbetejë po e shtyjnë atë të ndërmarrë akte të tilla, të pandershme, për të fajësuar Ukrainën. Gjatë vizitës së tij në luftanijen amerikane, Stoltenberg foli para më shumë se 100 trupave në bord, në një platformë pas të cilës ishin ngritur flamujt amerikanë dhe ata të 30 vendeve anëtare të NATO-s. Luftanija po udhëheq një grup sulmi, një flotë të marinës amerikane, që përfshin edhe një kryqëzor dhe katër destrojerë. Stoltenberg tha se ky grup sulmi dërgon një mesazh të fuqishëm se aleatët e NATO-s janë në vigjilencë të shtuar nga Baltiku në Mesdhe e deri në detin e zi.