Dy persona janë arrestuar nga Policia gjatë operacionit të koduar “Distanca”. Ata u kapën nga agjentët e sektorit të hetimit të narkotikëve, ndërsa akuzohen për prodhim dhe trafikim të bombave me telekomandë për shpërthim në distancë. Erold Cici 33 vjec dhe Mariglen Gruda 30 vjec, që të dy nga Durrësi, që i fundit i dënuar edhe më parë u kapën gjatë tentativës së tyre për të trafikuar në Malin e Zi, dy bomba me telekomandë. Zbulimi u bë i mundur pas një hetimi proaktiv prej një muaji, duke mbajtur nën përgjim dy të arrestuarit. Këta shtetas u kapën në flagrancë në vendin e quajtur "Rrethrrotullimi i Shëngjinit", në hyrje të qytetit të Lezhës. Gjatë kontrollit të ushtruar nga Policia, në çantën e shtetasit M. G. janë gjetur dy bomba me mekanizëm shpërthimi në distancë nëpërmjet aparatit telefonik celular, ku njëra ishte me lëndë të dyshuar plasëse e llojit tritol dhe tjetra me lëndë të dyshuar si plasëse e llojit dinamit, të cilat dyshohet se do t’i trafikonin në drejtim të Malit të Zi.