Në kuadër të sigurisë së pushuesve në mbarë vendin, Policia Kufitare dhe Njësia Policore Detare vijojnë kontrollet dhe monitorimin në terren, me qëllim garantimin e rendit dhe sigurisë në hapësirat detare, liqenore dhe lumore. Gjatë kontrolleve të zhvilluara në Ksamil janë bllokuar 20 mjete detare, mes tyre 8 për shkelje të perimetrit të sigurisë. Policia ndërhyri gjithashtu në 8 raste emergjente, duke shpëtuar 11 persona , përfshirë edhe turistë të huaj që kishin mbetur në rrezik për shkak të motit të keq apo defekteve teknike. Nga Velipoja në Ksamil, janë kontrolluar gjithsej 316 mjete lundruese. Për shkelje të rënda të perimetrit të sigurisë, 8 drejtues mjetesh janë ndëshkuar me gjobë 100.000 lekë secili, pasi rrezikuan jetën e pushuesve.