Vendimi i qeverisë greke për të mbajtur mbyllur kufijtë për autobusët shqiptarë ka sjellë jo pak probleme në lëvizjen e udhëtarëve në pikën kufitare të Kakavijës. Nën temperatura që arrijnë 42-43 gradë udhëtarët shqiptarë mbahen për orë të tëra në radhë për të vulosur dhe në vazhdim sërish në rradhë për kontrollin doganor dhe së fundmi sërish në radhë për të hipur në autobusët e kompanisë së udhëtarëve të janinës, për t’u transportuar për në destinacionin e tyre final. Një udhëtim që përveç lodhjes së madhe fizike zgjat edhe 14-15 orë për të përfunduar. Autoritetet doganore greke thanë fillimisht se autobusët shqiptarë mund të kalojnë, por në vazhdim e morën mbrapsht këtë vendim, nën presionin e kompanisë greke të udhëtimit, duke krijuar kështu radhë te gjata dhe kushte që as në vendet e botës së tretë nuk mund të shihen më.