Sekretari amerikan i shtetit, Antony Blinken, tha të premten se e mirëpret vendimin e Izraelit për një pauzë humanitare në ofensivën e tij në Gaza, por duhet të bëhet më shumë. "Shumë palestinezë janë vrarë. Ka shumë që kanë vuajtur javët e fundit, dhe ne duam të bëjmë gjithçka që është e mundur për të parandaluar dëmtimin e tyre, dhe për të rritur ndihmën që u jepet atyre," tha Blinken duke folur në Nju Delhi. Një ditë më parë, Shtëpia e Bardhë njoftoi se izraeli kishte rënë dakord për pauza katër-orëshe humanitare, cdo ditë, në veri të Gazës. Administrata e presidentit amerikan, Joe Biden, tha edhe se ka siguruar një rrugë të dytë për civilët që ata të largohen nga luftimet. Vetë presidenti Biden i kishte kërkuar kryeministrit izraelit, Benjamin Netanyahu, që të vendoste pauza ditore në operacionet e tij kundër hamasit, gjatë një bisede telefonike në fillim të kësaj jave. Sipas Ministrisë së Shëndetësisë në Rripin e Gazës, të drejtuar nga grupi ekstremist palestinez, në operacionet e përditshme të izraelit që pasuan 7 tetorin, kanë humbur jetën më shumë se 10.800 persona, mes të cilëve shumë fëmijë.