Presidenti i Bjellorusisë, Aleksandër Lukashenko është vetë ofruar të presë bisedimet e armëpushimit Rusi-Ukrainë që mund të përfshijnë zyrtarë amerikanë, tha ai në një intervistë të publikuar të mërkurën. Bjellorusia ka pritur më herët bisedime mes zyrtarëve rusë dhe ukrainas në 2014 dhe 2015, të ndërmjetësuara nga Franca dhe Gjermania, që rezultuan në marrëveshjet e Minskut të 2014 dhe 2015, që kanë marrë emrin e kryeqytetit bjellorus. Lukashenko është një aleat i ngushtë i presidentit rus Vladimir Putin. “Thuajini Trumpit se e pres këtu me Putinin dhe Zelenskyn”, tha Lukashenko në një intervistë video me blogerin amerikan Mario Naëfal, raportuar nga agjencia shtetërore e lajmeve Belta. Minsku është nën sanksionet e SHBA-së dhe Evropës për mbështetjen e tij për aksionin ushtarak të Rusisë në Ukrainë dhe raprezaljen mbi opozitën nga ana e qeverisë. Rusia përdori territorin bjellorus për të çuar trupa në Ukrainë në vitin 2022. Por presidenti 70-vjeçar thotë: "Ne do të ulemi dhe do të bëjmë një marrëveshje me qetësi. Nëse doni një marrëveshje." Lukashenko tha se duhej të kishte një marrëveshje me Zelenskin "pasi një pjesë e madhe e shoqërisë ukrainase e mbështet atë".