Bjellorusia, një aleate e Rusisë në luftën e saj në ukrainë, tha të mërkurën se forcat e saj të armatosura do të nisnin një mobilizim 10 ditor, të përvitshëm. Ministria bjelloruse e mbrojtjes tha se bëhet fjalë për një stërvitje që ka si qëllim të vlerësojë shkallën e përgatitjes së institucioneve shtetërore për të mobilizuar rezervistët. Të gjithë burrat bjellorusë duhet të kryejnë shërbim ushtarak dhe të mbeten rezervistë pasi ta përfundojnë atë. Bjellorusia lejoi Rusinë të përdorte territorin e saj për të nisur pushtimin në shkallë të plotë të Ukrainës, vitin e kaluar. Që atëherë, ka kryer stërvitje të shpeshta ushtarake me rusinë dhe ka lejuar forcat ruse të përdorin bazat e saj për trajnime. Këtë muaj madje, vendi priti edhe raketat taktike bërthamore që presidenti rus Vladimir Putin, tha se kishin si qëllim të jepnin një paralajmërim për perëndimin. Forcat bjelloruse nuk i janë bashkuar zyrtarisht luftës, në krah të rusisë, por presidenti Aleksander Lukashenko, ka thënë se vendi i tij do të hynte në konflikt në rast të një agresioni ndaj tij. Bjellorusia ndodhet në veri të Ukrainës, dhe Kievi duhet të ruhet për shkak të rrezikut të një sulmi të ri nga ai drejtim, ndërsa ka nisur kundërofensivën kundër forcave ruse në jug dhe lindje të vendit.