Policia ka arrestuar Nevzat Spahon, 29 vjeç, si person të dyshuar për përfshirje në vrasjen e Edmond Hykës, i njohur si Mondi Mëhalla, ngjarje e ndodhur më 30 nëntor 2025 në ambientet e jashtme të një karburanti në lagjen “Emin Matraxhiu”. Ndalimi i tij u krye në kuadër të operacionit policor “Strike”, i cili po vijon me qëllim identifikimin, kapjen dhe individualizimin e përgjegjësisë penale të të gjithë personave të përfshirë në këtë krim. Spaho po hetohet për veprat penale “Vrasje me paramendim”, kryer në bashkëpunim dhe “Prodhimi dhe mbajtja pa leje e armëve, armëve shpërthyese dhe municionit”. Sipas Policisë, ai rezulton të ketë pasur precedent penal për tentativë vrasjeje, armëmbajtje pa leje, kanosje për përfitime pasurore dhe vjedhje. Gjatë operacionit janë sekuestuar një automjet, një telefon celular dhe prova të tjera materiale që do të shërbejnë në hetim.