Zhdukja e biznesmenit Davide Pekoreli vijon të jenë e mbuluar nga misteri, pavarësisht hetimeve italo-shqiptare që po kryhen për këtë rast. Prokuroria shqiptare dhe ajo italiane presin rezultatet e mjekësisë ligjore për eshtrat e gjetur në automjet, ndërsa edhe në Shqipëri janë marrë disa dëshmi, duke filluar me personin që njoftoi policinë për makinën e gjetur në vendin e quajtur “Kodra e bardhë” në aksin Fushë-Arrëz-Gjegjan-Mirditë. Sakaq hetimet vijojnë mes një ngjarje aksidentale të cilën e zbeh fakti se si 45-vjeçari nuk tentoi daljen nga mjeti, ndërkohë që pista e një shpërthimi të mundshëm të mjetit bie poshtë nga vetë pozicionimi jashtë rrugës së makinës, e cila lë të dyshosh se ishte parkuar buzë greminës. Prokuroria e Pukës ende nuk ka në dorë të dhënat e celularit që u gjet në makinën e Pekorelit, ndërsa vetë hetuesit shqiptar, por dhe ata italianë tashmë janë të dyzuar mes një vdekje aksidentale, asaj të paramenduar me qëllime të caktuara, apo një tentative për humbje gjurmësh nga ana e biznesmenit për qëllime të caktuara, një prej të cilave dhe ajo për përfitimin të siguracionit të jetës.