Në gjermani po nxehet debati për shkak të reformimit të shtetit social në vend. Të dhënat tregojnë se shteti social gjerman, nuk është në gjendjen e tij më të mirë si për sa i takon sigurimit shëndetësor, ashtu edhe për kujdesin për të moshuarit, pensionet apo pagesat e papunësisë. Në të gjithë këta sektorë, qeveria duhet të injektojë rregullisht sasi të mëdha parash nga tatimet e shtetit për të shmangur kolapsin e shtetit social. Koalicioni aktual qeveritar kur erdhi në pushtet premtoi reforma gjithëpërfshirëse të shtetit social dhe modernizimin e sistemeve të sigurimeve shoqërore të Gjermanisë. Por ka mosmarrëveshje se si do të arrihet kjo. Kancelari Friedrich Merz ka lënë të kuptohet se muajt e ardhshëm në Gjermani do të ketë debate të forta si brenda koalicionit ashtu edhe në shoqërinë civile në lidhje me këto reforma. Ku do të ketë reformim, ku do të ketë shkurtime dhe sa të forta do të jenë ato? "Shteti social siç e kemi sot nuk është më i financueshëm", tha Merz në një konferencë të partisë së tij në fundjavë, duke theksuar nevojën për një riorganizim të politikave sociale. Reagimi i Kancelarit Merz erdhi pas propozimit nga SPD-ja për rritjen e tatimeve. Zëvendëskancelari Lars Klingbeil nga socialdemokratët kishte deklaruar më herët se nuk përjashtonte mundëisnë e taksave më të larta për ata që kanë të ardhura të larta dhe të pasurit.