Një ngjarje e rëndë është shënuar në Torino të Italisë. Sipas mediave përtej Adriatikut, një ndërtesë është shembur në qytetin e njohur, duke lënë të vdekur një 4-vjeçar shqiptar, e të plagosur nënën e tij dhe dy persona të tjerë. Sipas raportimeve, 2 prej të plagosurve ndodhen në gjendje të rëndë në spital. Ndërkohë, ekipet e kërkim-shpëtimit janë ende duke kërkuar nën gërmadhat, pasi dyshohet se ndodhen edhe 2 persona të tjerë. Mediat italiane raportojnë se viktima është i moshës 4-vjeçare dhe quhet Aron. E plagosur ka mbetur edhe nëna e fëmijës, shqiptarja e paidentifikuar ende, 34-vjeçe, e cila u nxorr nga rrënojat dhe është transportuar në spital. Babai, me shtetësi shqiptare, i moshës 40-vjeçare, i cili mbërriti pak më vonë në skenën ku ka ndodhur shembja e godinës, u transportua në spital pasi ishte në gjendje të shokuar kur mësoi lajmin. Mësohet se tre persona kanë mbetur të plagosur, ku dy prej tyre janë në gjendje më të rëndë. Shembja e godinës ndodhi para orës 9 të mëngjesit të sotëm në Strada del Bramafame në Torino, jo shumë larg rrugës së aeroportit dhe Stadiumit “Allianz”. Sipas mediave italiane, zhurma ishte aq e fortë sa u dëgjua deri në rrethin Madonna di Campagna. “Repubblica.it” raporton se një godinë banimi dykatëshe me gjashtë apartamente ku jetojnë kryesisht familje me origjinë shqiptare dhe rumune, u shemb, e prej saj vetëm një pjesë ka mbetur në këmbë. Një rrjedhje gazi dyshohet të ketë shkaktuar ngjarjen, megjithatë hetimet po vijojnë. Pamjet: AFP