Ukraina tha se nuk është nën presion nga shtetet perëndimore për të negociuar me Rusinë, ndërsa insistoi se ajo është e hapur për dialog me moskën, por jo me presidentin Vladimir Putin në detyrë. Negociatat, sipas Kievit, mund të zhvillohen nëse rusia heq dorë nga të gjitha pjesët e pushtuara të Ukrainës. Deklarata vjen pasi gazeta amerikane Uashington Post, raportoi se SHBA po e inkurajon Kievin të sinjalizojë se është i gatshëm të bisedojë me rusinë. Por, për presidentin ukrainas, Volodimir Zelenski, ka disa kushte krejtësisht të kuptueshme, që do ta ulnin atë në bisedime paqeje me rusinë. “Po e përsëris, rikthimi i integritetit territorial, respektimi i Kartës së Kombeve të Bashkuara, kompensimi i të gjitha dëmeve të shkaktuara nga lufta, dënimi i cdo krimi lufte dhe garanci se kjo nuk do të ndodhë sërish”, tha Zelenski.