Presidenti amerikan Joe Biden anuloi udhëtimin e fundit jashtë vendit të presidencës së tij, në Romë dhe Vatikan, duke zgjedhur të qëndrojë në Uashington për tiu përgjigjur krizës së shkaktuar nga zjarret shkatërrimtare në Kaliforni. Biden duhej të nisej të enjten pasdite, pasi të nderonte ish presidentin Xhimi Karter në një shërbim memorial në Uashington, për një udhëtim tre ditor gjatë të cilit do të takohej me Papa Franceskun, presidentin italian Sergio Matarella dhe kryeministren Giorgia Meloni. Biden shpalli të mërkurën gjendjen e emergjencës në kaliforni, cka do të bëjë që të clirohen fonde dhe burime federale për të luftuar zjarret. “Jemi të përgatitur të bëjmë gjithçka dhe për aq kohë sa duhet, për të kontrolluar këto zjarre, për të ndihmuar në rindërtim dhe për t'u siguruar që të kthehemi në normalitet. Do të jetë një rrugë e gjatë”, tha Presidenti Biden. Departamenti amerikan i Mbrojtjes tha se "do të punojë për të siguruar personel dhe aftësi shtesë për zjarrfikësit" në Kaliforni në betejën me flakët. Shuma totale e dëmeve nga zjarret mund të shkojë midis 52 miliardë dhe 57 miliardë dollarëve ose edhe më shumë, sipas një analize nga Qendra Globale e Motit e kompanisë "AccuËeather". Dy mijë pjesëtarë të Gardës Kombëtare janë dislokuar për të ndihmuar zjarrfikësit vendas. Uashingtoni po mbështet përpjekjet për shuarjen e zjarrit të Kalifornisë me katër avionë të mëdhenj cisternë të Shërbimit Pyjor të Shteteve të Bashkuara dhe u njoftua se është nisur edhe një i pestë shtesë. Qeveria federale po ndihmon edhe me 10 helikopterë përpjekjet për shuarjen e zjarrit. Ndërkohë, dhjetëra zjarrfikëse të Shërbimit Pyjor u vendosën në gatishmëri për t’u dislokuar.