Presidenti amerikan, Joe Biden i ka fituar lehtësisht zgjedhjet paraprake demokratike në Miçigan, por një votë proteste e demokratëve të zemëruar për mbështetjen e tij për luftën e Izraelit kundër Hamasit në Gazë, i ka tejkaluar pritshmëritë e organizatorëve. Ish-presidenti amerikan Donald Trump në anën tjetër i fitoi bindshëm zgjedhjet paraprake republikane në këtë shtet, duke rritur akoma më shumë mundësitë për të fituar nominimin e partisë së tij, për zgjedhjet presidenciale të nëntorit. Ndonëse Biden dhe Trump pritej që të fitonin lehtësisht në zgjedhjet paraprake në këtë shtet, procesi i numërimit të votave është vëzhguar nga afër, për të parë dozën e mbështetjes që ata gëzojnë. Në Miçigan, ku gjendet një komunitet i madh arabo-amerikan, votuesve demokratë u është bërë thirrje që të plotësojnë fletëvotimet si “të pavendosur”, si shenjë proteste për politikën e Bidenit për Gazën. Pas pothuajse gjysmës së votave të numëruara, numri i votuesve “të pavendosur”, ka shkuar në mbi 58.000, sipas organizatës Edison Research, duke e tejkaluar shifrën 10.000 që e kishin pritur organizuesit e protestës. Shumë prej pjesëtarëve të komunitetit arabo-amerikan, që e kanë përkrahur Bidenin më 2020, tani janë të zemëruar. Biden tha më vonë, përmes një deklarate, se falënderon çdo banor të Miçiganit, të cilit i është dëgjuar zëri.