Presidenti i Republikës, Bajram Begaj, u prit në një takim nga Guvernatori i Austrisë së Epërme, Thomas Stelzer. Në takim e mbajtur në Linz, Begaj e Stelzer biseduan për forcimin e bashkëpunimit ekonomik dhe rritjen e investimeve me interes të përbashkët. Presidenti Begaj ftoi Guvernatorin për krijimin e hapësirave, në mënyrë që të shfrytëzohen potencialet që Shqipëria ofron për investitorët austriakë. “Unë shoh shumë mundësi për bashkëpunim në ekonomi, hoteleri, turizëm dhe sektorë të tjerë”, - deklaroi Kreu i Shtetit pas bisedës me Guvernatorin e Austrisë së Epërme në Linz: “Aktualisht, Shqipëria ka bërë hapa përpara, është një vend i cili njeh progres ekonomik dhe mendoj se kjo vizitë në Austrinë e Sipërme është një mundësi e mirë për të shikuar mundësi të reja bashkëpunimi në fusha të ndryshme, të cilat mund të jenë me interes të përbashkët. Unë shoh shumë mundësi në turizëm, në energji, në ambient, në digjitalizim”, - deklaroi Presidenti Begaj.