Shërbimi diplomatik i BE-së u ka bërë thirrje vendeve anëtare që të vlerësojnë më mirë mundësinë e një misioni trajnimi ushtarak në Ukrainë, por nuk rekomandoi që blloku të dërgojë instruktorë ushtarakë në vendin e përfshirë nga lufta, raportoi të shtunën e përjavshmja gjermane Ëelt am Sonntag. Misioni EUMAM, i nisur në nëntor 2022, ka trajnuar rreth 60,000 trupa ukrainase kryesisht në Poloni dhe Gjermani dhe është vendosur që ky mision të zgjatet edhe për dy vjet të tjera pasi mandati aktual do të përfundojë në mes të nëntorit. "Është e domosdoshme të trajnohen ushtarët ukrainas me të njëjtat pajisje që ata do të përdorin më vonë në fushëbetejë," citoi raporti misionin e shërbimit diplomatik të BE-së, duke shtuar se ministrat e mbrojtjes të bllokut do të diskutojnë për këtë temë në vijim. Ai tha se mungesa e pajisjeve të stilit sovjetik ishte një nga sfidat e trajnimit aktual në BE.