Dy vite pas shembjes së Teatrit Kombëtar, Bashkia e Tiranës ka hapur garën për ndërtimin e këtij objekti, garë e cila do të zgjasë plot 60 ditë. Lajmi u bë me dije nga kryetari i bashkisë Tiranë Erion Veliaj në mbledhjen e zhvilluar në Këshillin Bashkiak, i cili tha se teatri i rindërtuar do të jetë më moderni në Ballkan. “Me vendimin që marrim sot kalojmë fazën e fundit burokratike, hapjen e garës ndërkombëtare, e cila zgjat 60 ditë, dhe me të shpallur fituesin do të fillojmë ndërtimin e Teatri të ri sipas projektit danez të Bjarke Ingels. Do të kemi teatrin më modern në Ballkan! Viti 2025 do e gjejë Tiranën me një teatër të ri, edhe pse njësoj si me projektin e Unazës së Madhe te Astiri, sherri na mori 3 vjet kohë”. Kryebashkiaku i Tiranës foli me siguri, duke thënë se Teatri i Ri do të jetë një tjetër sukses në kryeqytet, si Liqeni, Pazari dhe Unaza e Madhe.