Kryetari i Partisë Demokratike, Lulzim Basha, ishte në banesën me qira të çiftit të sapomartuar Mikel Kungulli dhe Xhesika Rusi, ku iu shpjegoi atyre dhe të gjithë familjeve të reja shqiptare efektet e Programit Ekonomik të PD. Kryedemokrati theksoi se më 25 prill, ose fiton Shqipëria ose Edi Rama. Sipas tij këto janë rrugët për shqiptarët më 25 prill. "Më 25 fiton Shqipëri, fitoni ju. Kjo është beteja, jo thjeshtë një parti apo një koalicion", tha Basha. Ndërsa Mikel Kungulli iu drejtua se "shpreson se do të mbahen këto premtime, sepse përherë kanë dëgjuar vetëm fjalë këto vite. Plotësohen fjalët dhe të bëhet me vepra, sepse çdo gjë është hedhur në kosh të plehra". Basha u ndal tek ekonomia, punësimi i të rinjve, por mbi të gjitha mundësia e blerjes së një shtëpie. Basha tregoi me detaje efektet pozitive që do të sjellë për familjet e reja programi ekonomik, ku në fokus do të jetë strehimi, punësimi dhe fëmijët. “Me planin tonë ekonomik ne i gjendemi pranë të rinjve dhe në veçanti familjeve të reja, çifteve të reja si ju, nga fillimi e deri në vazhdimësi. Si i gjendemi pranë ? E para, për çdo fëmijë të porsalindur do të jepet çdo muaj një përkrahje prej 30 mijë lekë të vjetra. Nuk është ndonjë shumë mrekulli por është një shumë e mjaftueshme për të përballuar kostot shtesë që sjell një fëmijë i porsalindur deri në moshën 5 vjeç, muaj për muaj 30 mijë lekë të vjetra për çdo fëmijë të porsalindur. Basha tha se qëllimi është që brenda 4-vjeçarit të parë të qeverisë që do të dalë nga 25 Prilli, 20 000 mijë familje dhe çifte të reja të kenë përfituar nga kjo skemë dhe të kenë një banesë të tyren të blerë sigurisht me kredi, por kur interesat e kredisë paguhen 100 për qind nga shteti.