Pjesa e pasme e një avioni pasagjerësh ka marrë flakë në një aeroport në Korenë e Jugut të martën, duke detyruar evakuimin e 176 personave në bord, thanë autoritetet. Avioni i Air Busan, një Airbus A321, duhej të fluturonte për në Hong Kong nga Aeroporti Ndërkombëtar Gimhae në Busanin juglindor, por mori flakë rreth orës 22:15 minuta sipas orës lokale, tha ministria e transportit në një deklaratë. Gjithsej 169 pasagjerë dhe shtatë stjuardesa dhe pjesëtarë stafi u evakuuan me urgjencë, tha ministria. Deklarata nuk dha asnjë informacion për shkakun e zjarrit, përveçse theksoi se flakët shpërthyen në pjesën e pasme të avionit. Agjencia Kombëtare e Zjarrfikësve tha se tre persona u plagosën lehtë gjatë evakuimit. Zjarri u shua plotësisht në orën 23:31 minuta sipas orës lokale, thanë zyrtarët. Koreja e Jugut pësoi katastrofën më të rëndë të aviacionit në tokën e saj, muajin e kaluar, kur një boeing 737-800, që fluturonte nga Tajlanda në Muan, më 29 dhjetor, bëri një ulje emergjence dhe shpërtheu në një lëmsh të madh zjarri pasi u përplas me një barrierë betoni. Ai aksident vrau 179 nga 181 pasagjerët dhe anëtarët e ekuipazhit në bord.