Një avion pasagjerësh nga Tanzania është rrëzuar në Liqenin Victoria ndërsa përpiqej të ulej në një qytezë pranë liqenit, Bukoba, duke i marrë jetën të paktën tre personave. Avioni i kompanisë Precision Air, kishte 43 persona në bord, prej të cilëve 26 janë shpëtuar dhe janë dërguar në spital. Dy pilotët i mbijetuan aksidentit por mbetën të bllokuar në kabinë ndërkohë që skuadrat e emergjencave përpiqeshin ti lironin. Këto të fundit, bashkë me peshkatarë lokalë, mbërritën menjëherë në vendngjarje duke u përpjekur të shpëtonin personat e bllokuar brenda në avion. Ata përdorën litarë për të tërhequr avionin më pranë bregut të liqenit Victoria, më i madhi në Afrikë.