Zjarret që kanë përfshirë malin e Parnithës, kanë bërë që Athina të mbulohet nga një mjegull tymi, e cila është ngjitur deri lart në Akropol. Në shgumë lagje të kryeqytetit grek ndihet nëj erë e rëndë djegieje, teksa policia greke ka mbyllur qarkullimin në disa rrugë dhe vijon të orientojë trafikun në të tjera. Fotot e publikuara nga mediat greke, tregojnë atmosferën mbytëse në kryeqytetin grek, në orët e para të mëngjesit të të enjtes, teksa ekspertët e shëndetit vijojnë të bëjnë paralajmërime. Personat që kanë probleme me frymëmarrjen, apo sëmundje kardiovaskulare këshillohet të largohen nga kryeqyteti, ose në rastin tjetër, të mbyllin dyer e dritare, për të shmangur kontaktin direkt me tymin dhe erën e rëndë të djegies, që vjen për shkak të zjarreve që kanë pushtuar malin që ngrihet në veri të Athinës.