Ka shkuar në dy numri i viktimave nga atentati në Rinas. Policia njoftoi se Muçi Shaljani, njohur edhe me mbiemrin Sheqeri, ndërroi jetë natën mes të premtes dhe të shtunës. Ai qëndronte prej të martës në gjendje të rëndë si pasojë e plumbave që mori nga breshëritë që u lëshuan ndaj tij dhe Gilmando Danit. Ky i fundit humbi jetën në vendngjarje në atentatin e 11 nëntor. Shaljani dhe Dani sapo ishin kthyer nga Barcelona kur ndaj të dyve u bë atentat. Autorët u bënë pritë në rrethrrotullimin pranë aeroportit të Rinasit. Si pasojë e plumbave, Dani humbi jetën në vendngjarje, ndërsa fillimisht Shaljani mbeti i plagosur. Autorët më pas u larguan në drejtim të fshatit Halil ku dogjën makinën. Prej aty gjurmët e tyre janë zhdukur. Policia ka shpallur në kërkim Ylli Zallën pasi në shtëpinë e tij gjetën një arsenal armësh. Ka dyshime se nga banesa e tij ka dalë makina e atentatorëve, megjithatë kjo nuk konfirmohet ende zyrtarisht. Gilmando Dani, i cili mendohet se ishte shënjestra e sulmit është emër i njohur për drejtësinë, pasi njihej si pjesëtar i grupit të Emiljano Shullazit. Nga ana tjetër, rezultoi se Muçi Shaljani ishte në provë si agjent i Agjencisë së Mbikëqyrjes Policore. Në lidhje me këtë rast, AMP ka nisur një hetim për të zbuluar se si u rekrutua ai në radhët e agjencisë, që për detyrë ka kontrollin e policisë.