Shkodra e Malësia e Madhe nuk po gjejnë qetësi. Pas vrasjes së dy kushërinjve në Malësinë e Madhe para pak ditësh, një tjetër ngjarje e rëndë ka ndodhur këtë të dielë paradite, ku i është bërë atentat shefit të policisë bashkiake të Malësisë së Madhe. Mentor Hasanaj ka qenë duke udhëtuar me makinën e shërbimit së bashku me babain dhe gruan e tij, kur është qëlluar me breshëri plumbash në dalje të Shkodrës. Atentati ka ndodhur rreth ores 12.30, në Dobraç, pranë rotondës së monumentit të ‘5 heronjve’. Si pasojë e atentatit kanë mbetur të plagosur shefi i policisë bashkiake të Malësisë së Madhe, Mentor Hasanaj 37 vjeç dhe babai i tij 74 vjeçar, Xhelal Hasanaj. Fatmirësisht bashkëshortja e Mentorit, Vjollca Hasanaj, ka shpëtuar pa dëmtime. Të dy të plagosurit janë në gjendje kritike për jetën, por shefi i policisë bashkiake është në gjendje më të rëndë dhe është dërguar me urgjencë për mjekim në spitalin e Traumës në Tiranë. Policia e Shkodrës ka rrethuar zonën dhe kafilluar kërkimet për të rënë në gjurmët e autorëve. Ende nuk dihet numri I saktë I autorëve, por nga të dhënat e para dyshohet se ata kanë qenë 2 veta dhe kanë lëvizur me motor.