Atentat kundër Shqipërisë dhe integrimit, kështu e konsideron PD ndërtimin e Aeroportit të Vlorës, në kundërshti me Konventat ndërkombëtare dhe vetë qëndimin e BE. Deklarata vjen pas reagimit të Komitetit të Përhershëm të Konventës së Bernës ku u kërkon autoriteteve shqiptare pezullimin e punimeve për ndërtimin e Aeroportit të Vlorës dhe ndërmarrjen e një programi gjithëpërfshirës të monitorimit të jetës së egër. Në Progres-Raportin të Komisioni Europian shkruhet për aeroportin në zonën “Vjosë-Nartë”, se është në “konflikt me ligjet kombëtare dhe konventat ndërkombëtare të mbrojtjes së larmishmërisë biologjike, të cilat Shqipëria i ka ratifikuar”. Mjedisi është një çështje thelbësore për BE-në. Nëse qeveria shqiptare vazhdon me këmbëngulje të shkelë konventat, te mos zbatoj rekomandimet e Bashkimit Europian kjo është kosto e madhe për qytetarët shqiptarë në rrugën e integrimit. Krahas kësaj, Zhupa thekson se Partia Demokratike është pro ndërtimit të një Aeroporti për Vlorën dhe e mbështet zhvillimin, por nuk mund të pranojë që të shkelen ligjet, konventat, të cënohen standardet europiane, të rrezikohesh shkatërrimi i mjedisit vetëm për atë që e konsideron si një kapricio kryeministrore edhe projekte pa plane të mirëfillta.