Çështja e lejes për Fredi Belerin është kthyer në një patate të nxehtë për Gjykatën e Shkallës së Parë në Durrës. Por, teksa data e seancës po afron, dy gjyqtarë kanë hequr dorë nga gjykimi i kërkesës së Belerit. Fillimisht ka hequr dorë gjyqtari Rexhep Bekteshi, të cilit i kishte rënë shorti për ta gjykuar kërkesën. Më pas shorti i ra gjyqtares Besiana Garxenaj, e cila u tërhoq duke refuzuar të përfshihet në këtë çështje të nxehtë. Tashmë gjykimin e kërkesës së Belerit e ka marrë përsipër gjyqtarja Entela Shedola. Seanca është parashikuar të mbahet të mërkurën e javës së ardhshme. Beleri i është drejtuar gjykatës së Durrësit, ku vuan paraburgimin me kërkesën për lirim të përkohëshëm sa për të kryer betimin si kryebashkiak i Himarës. Fillimisht, kjo kërkesë është dorëzuar në Drejtorinë e Përgjithshme të Burgjeve, më pas në Gjykatën e Posaçme, që shpalli moskompetencën e saj, ndërsa Beleri akuzon burgjet se nuk i kthyen përgjigje. Paralelisht me këtë proces, Beleri ka vijuar betejën në të gjitha shkallët e gjyqësorit për t’u hetuar dhe gjykuar me një masë më të butë sigurie.